Berlín

Að loknum vel heppnuðum vortónleikum kammerkórsins í Hafnarfjarðarkirkju tekur nú við útrás til Þýskalands.

Að morgni hvítasunnudags, 8. júní, heldur kórinn af stað til Berlínar, þar sem dvalið verður við leik og störf til 12. júní.

Mánudaginn 9. júní, annan í hvítasunnu, verður sungið við messu í Dómkirkjunni í Berlín og hefst hún klukkan 10:00.

Síðar sama dag heldur kórinn tónleika í Maríukirkjunni í Berlín og hefjast þeir klukkan 15:30. Á þessum tónleikum verður efnisskrá tónleikanna frá 4. júní endurtekin.

Norræn kór- og orgeltónlist 20. aldar

Kammerkór Hafnarfjarðar heldur vortónleika sína í Hafnarfjarðarkirkju miðvikudaginn 4. júní kl. 20:00.

Viðfangsefnið að þessu sinni eru kórverk norrænna tónskálda frá Færeyjum, Noregi, Danmörku, Svíþjóð, Finnlandi, Álandi, landi Samanna og Íslandi.

Á tónleikunum mun Guðmundur Sigurðsson, organisti, leika nokkur orgelforspil. Stjórnandi kammerkórsins er sem fyrr Helgi Bragason.

Aðgangseyrir á tónleikana er 2000 krónur, en 1500 krónur fyrir námsmenn og eldri borgara.

Við tökum einnig við nýjum styrktarfélögum. Fyrir 6000 króna áskriftargjald fást tveir miðar á næstu þrenna tónleika kórsins. Á þann hátt fær styrktarfélaginn hvern miða á 1.000 krónur. Nánari upplýsingar og eyðublað eru á styrktarfélagasíðunni.

Næstu tónleikar

Kammerkórinn æfir nú af kappi fyrir tónleikaferðalag til Berlínar í júní.

Tónleikar með efnisskrá Berlínarferðarinnar verða haldnir í Hafnarfjarðarkirkju miðvikudaginn 4. júní.

Nánari upplýsingar verða birtar í fyllingu tímans.

Árshátíð 2014

Laugardaginn 8. mars næstkomandi ætla kórfélagar að hittast, taka sér frí frá hefðbundnum kórsöng, skemmta sér saman og fagna viðburðaríku og frábæru söngári. Já, það er komið að árshátíðinni 2014.

Hún verður að þessu sinni með örlítið breyttu sniði miðað við undanfarin ár. Aðgangur er ókeypis, en hver kórfélagi þarf að mæta með veitingar til að setja á sameiginlegt hlaðborð.

Árshátíðin verður haldin að Brekkuási 16 í Hafnarfirði (Heima hjá Möggu – sjá á korti). Húsið verður opnað klukkan 20:00 og hefst dagskráin klukkan 20:30.

Makar eru hjartanlega velkomnir, sem og gítarar og önnur hljóðfæri.

Mætum og höfum gaman saman.

Gleðilegt nýtt ár!

Fyrsta æfing ársins 2014 verður haldin miðvikudaginn 8. janúar kl. 20:00, á sama stað og venjulega.

Margt spennandi verður á dagskránni fram á vor. Hápunkturinn verður líklega ferðalag til Berlínar í júní.

Dagskráin í desember

Aðventu- og jólatónleikatörninni er lokið þetta árið. Kórinn er þó fjarri því kominn í jólafrí, því ýmislegt verður á dagskrá í desember.

Laugardaginn 7. desember verða Syngjandi jól haldin í Hafnarborg frá kl. 9:40 til kl. 17:00. Þar munu 23 hafnfirskir kórar og sönghópar koma fram. Kammerkórinn stígur á svið klukkan 16:20.

Á Þorláksmessu, 23. desember, verður farið í friðargöngu um miðbæ Hafnarfjarðar. Eins og undanfarin ár munu félagar úr kammerkórnum leiða sönginn í göngunni. Safnast verður saman við fríkirkjuna í Hafnarfirði og fer gangan af stað klukkan 19:30.

Á aðfangadagsmorgun, 24. desember, mun kórinn svo syngja í sjúkrahúsmessu á Kleppi, eins og venjan hefur verið síðustu árin. Messan hefst að þessu sinni klukkan 11:30.

Fyrir messuna verður haldin stutt æfing í Tónlistarskólanum miðvikudaginn 18. desember kl. 19:30.

Gleðilega aðventu!

Aðventu- og jólatónleikarnir 2013

Hátíð ber að höndum bjarta,
hverfur undan myrkrið svarta,
glaðna tekur guðhrædd þjóð,
geislum lýsist hugarslóð.

Aðventu- og jólatónleikar Kammerkórs Hafnarfjarðar verða haldnir í Hásölum mánudaginn 2. desember og þriðjudaginn 3. desember kl. 20.00.

Í þetta sinn flytur Kammerkórinn úrval aðventu- og jólalaga og lofar að koma öllum í hátíðarskap.

Að venju sitja tónleikagestir til borðs og þiggja kaffi og konfekt.

Aðgangseyrir er kr. 2.000 og 1.500 fyrir eldri borgara.

Við minnum einnig á að alltaf er tekið við nýjum styrktarfélögum. Fyrir 6.000 krónur fær styrktarfélagi tvo miða á næstu þrenna tónleika kórsins. Þannig fæst hver miði á 1.000 krónur. Nánari upplýsingar eru á styrktarfélagasíðunni.

Kórahátíð í Hörpu

Í tilefni 75 ára afmælis Landssambands blandaðra kóra verður efnt til kórahátíðar í Hörpu dagana 19.-20.október. Kammerkór Hafnarfjarðar tekur þátt í hátíðinni ásamt 22 öðrum kórum.

23 kórar syngja fyrir gesti og gangandi í Hörpu kl. 13:30-17:00 laugardaginn 19. október í Norðurljósum og víðs vegar um Hörpu. Kammerkórinn verður með tónleika í Norðurljósum kl. 15:20 og í  Hörpuhorni kl. 16:15. Aðgangur á þessa tónleika er ókeypis.

Síðari dag hátíðarinnar, sunnudaginn 20. október kl. 15:00, sameinast þátttakendur, samtals um 850 kórsöngvarar og syngja á hátíðartónleikum í Eldborg. Kórarnir flytja þar eigin dagskrá og sameinast svo allir í þjóðsöngnum og 4 perlum íslenskra kórbókmennta – og er þá tónleikagestum boðið að taka undir! Á tónleikunum verður frumflutt kórverk eftir Hreiðar Inga Þorsteinsson.  Aðalstjórnandi hátíðarinnar er einn þekktasti kórstjóri Norðurlanda, Robert Sund.

Miðaverð á hátíðartónleika sunnudagsins er frá 3200 – 3700 kr. Hægt er að kaupa miða í gegnum heimasíðu Hörpu.

Nánari upplýsingar um kórahátíðina og LBK er hægt að nálgast á heimasíðu sambandsins.

Sumarfríið á enda

Nú er „sumarið“ senn á enda (ekki að það hafi komið neitt alvöru sumar í Hafnarfirði) og því tími til kominn að hita raddböndin upp fyrir átök vetrarins.

Fyrsta æfing haustsins verður haldin miðvikudaginn 4. september kl. 20:00 á sama stað og venjulega.